## “Piano Lovers” уралдааны онцлог “Piano Lovers” уралдааны маань энэ жилийн онцлог бол технологид суурилсан илүү ил тод, шударга, хариуцлагатай шүүлтийн тогтолцоог бүрдүүлсэн явдал байлаа. Бүх шүүлт цаас ашиглалгүй, гар утас болон таблет ашиглан онооны системд шүүгч бүрийн өгсөн дүн шууд хадгалагдахаар хийгдсэн. Энэ нь онооны будлиан, алдаа гаргах эрсдэлийг бууруулах, мөн илүү нээлттэй, хяналттай байдлыг хангах зорилготой байсан юм.

“Piano Lovers” уралдааны онцлог

“Piano Lovers” уралдааны маань энэ жилийн онцлог бол технологид суурилсан илүү ил тод, шударга, хариуцлагатай шүүлтийн тогтолцоог бүрдүүлсэн явдал байлаа. Бүх шүүлт цаас ашиглалгүй, гар утас болон таблет ашиглан онооны системд шүүгч бүрийн өгсөн дүн шууд хадгалагдахаар хийгдсэн. Энэ нь онооны будлиан, алдаа гаргах эрсдэлийг бууруулах, мөн илүү нээлттэй, хяналттай байдлыг хангах зорилготой байсан юм.

Японы нэрт шүүгч багш маань манай уралдаанд хүрэлцэн ирж, олон улсын түвшний хатуу бөгөөд шударга шүүлтийн арга барилаар шүүж, маш чухал туршлага хуваалцсан. Түүний шүүлтийн арга барилд ганц дүгнэлтээр биш, хүүхдийн тоглолтын туршид хийж буй сайжрал, алдаа бүрийг анзаарч, оноогоо унаган, ахиулан дүгнэсэн нь олон багш, хүүхдэд шинэ сэтгэгдэл төрүүлсэн.

Гэвч харамсалтай нь зарим оролцогчийн эцэг эх, багш нар шүүлтийн дүнг бүрэн хүлээн зөвшөөрөхгүй, бага оноо тавьсан, гран при авах ёстой байсан гэх зэргээр уралдааныг болон шүүгчдийн шийдвэрийг хүндлэлгүйгээр хүлээн авч буй нь зохион байгуулагч бидний зүгээс анхаарах шаардлагатай асуудал байлаа.

Уралдаан бол өрсөлдөөнт, тодорхой шалгууртай орчин бөгөөд тухайн тоглолтын гүйцэтгэлийг үнэлдэг. Мөн шүүгч бүрийн дүгнэлт бол мэргэжлийн үнэлгээ юм.

Оролцогч хүүхдүүдийг зөв хандлага, шүүмж хүлээж авах чадварт сургах нь багш, эцэг эхийн хамтын үүрэг гэдгийг сануулах нь зүйтэй. Түүнээс тэдний урмыг хугалж загнаж зандарч хэл ам хийх нь ёс зүйн хувьд маш буруу үйлдэл. Уралдаан нь зөвхөн шагнал авах биш, ур чадвар, сэтгэл зүйн бэлтгэлийг тэсвэртэйгээр хөгжүүлэх талбар юм.

Харин дараагийн шатанд илүү бэлтгэлтэй оролцох, бодитой үнэлгээг сургалтын явцдаа ашиглах нь үр дүнтэй.

Манай уралдаан шагнал өгөхдөө бус, хөгжих боломж өгөхөөр зорьдог. Хүүхдүүдийн ирээдүйд үнэ цэнтэй туршлага, сэтгэл зүй, ур чадварыг төлөвшүүлэх нь хамгийн чухал.

Бид уралдааныг жилээс жилд илүү сайжруулж, шүүлтийн шударга байдал, оролцогчдын хөгжлийг тэргүүн зорилтоо болгож ажилладаг. Та бүхний ойлголт, хамтын дэмжлэг бидний ажлыг улам үнэ цэнтэй болгоно гэдэгт итгэж байна.

Та бүхэндээ баярлалаа. Гэгээн бүхнийг хүсье.